An tSeachtain um Ionad Oibre Frithchiníoch - 6th to 12th Nov 2006

An tIonad Oibre Idirchultúrtha

Tionscnamh uile-oileáin atá ag tarlú go comhuaineach in Éirinn agus i dTuaisceart Éireann is ea an tSeachtain um Ionad Oibre Frithchiníoch. Freagraíonn an tSeachtain do thiomantas sa Chomhaontú Náisiúnta 'I dTreo 2016' go ''dtabharfar aghaidh go réamhghníomhach ar an gciníochas san ionad oibre i gcomhthéacs na Seachtaine um Ionad Oibre Frithchiníoch agus i gcomhréir leis an gcleachtas idirnáisiúnta is fearr sa réimse seo''.

Féachann na heagraíochtaí comhpháirtíochta a ghlacann páirt sa tSeachtain um Ionad Oibre Frithchiníoch le hionaid oibre a spreagadh agus a neartú chun:

A bheith saor ón idirdhealú agus ón gciapadh.
A bheith fáiltiúil roimh fhostaithe -agus roimh chustaiméirí/úsáideoirí seirbhíse- gorma agus ó mhionlaigh eitneacha (agus iad siúd ón Lucht Siúil san áireamh).
Ceann a thógáil don éagsúlacht chultúrtha theangeolaíoch, oiriúnú a dhéanamh di agus ardmheas a bheith uirthi, i measc na bhfostaithe agus i measc na gcustaiméirí i gcomhar le freastal níos leithne ar an éagsúlacht, agus freastal réasúnta ar dhaoine faoi mhíchumas san áireamh.
Bearta praiticiúla a dhéanamh ar mhaithe leis an gcomhionannas iomlán ó thaobh an chleachtais de.
Teachtaireacht a chraobhscaoileadh ó thaobh a thuilleadh comhionannais a chur chun cinn laistigh dá bpobal i gcoitinne.

Is éard atá sa tSeachtain um Ionad Oibre Frithchiníoch ná eochairchuid den Phlean Gníomhaíochta Náisiúnta i gCoinne an Chiníochais. Is í is aidhm fhoriomlán leis an bPlean ná treoir straitéiseach a chur ar fáil chun an ciníochas a chomhrac agus sochaí níos uileghabhálaí agus níos idirchultúrtha a fhorbairt in Éirinn. Ar áireamh sa Phlean tá tiomantas chun na prionsabail a leagtar amach mar chuid den tSeachtain um Ionad Oibre Frithchiníoch a shaothrú agus a phríomhshruthú isteach i mbeartas na fostaíochta agus an ionaid oibre.

An Comhtháthú san Ionad Oibre Téama don bhliain 2006

Táthar tar éis an Comhtháthú a shainaithint mar an téama croíláir i gcomhair na Seachtaine um Ionad Oibre 2006.

Cuimsíonn an Comhtháthú Éifeachtach:

Gníomh chun tacú le fostaithe gorma agus fostaithe ó mhionlaigh eitneacha (agus fostaithe ón Lucht Siúil san áireamh), go háirithe oibrithe imirceacha, iad féin a chur in oiriúnt don ionad oibre agus a bheith gafa go héifeachtach leis an bpobal áitiúil.
Gníomh chun tacú leis na fostaithe go léir na scileanna, an teolas agus an fheasacht a fhorbairt chun a bheith ag feidhmiú agus a bheith gafa go héifeachtach le hionaid oibre atá éagsúil ó thaobh an chultúir de.
Gníomh chun forbairt a dhéanamh ar bheartais, ar ghnáthaimh agus ar chleachtais an ionaid oibre a thógann ceann don éagsúlacht chultúrtha theangeolaíoch, a chothaíonn an comhionannas iomlán ó thaobh an chleachtais de, agus a chruthaíonn timpeallacht fháiltiúil i gcomhair na bhfostaithe gorma agus fostaithe ó mhionlaigh eitneacha (agus fostaithe ón Lucht Siúil san áireamh).

Déanann an comhtháthú éifeachtach a chion ar mhaithe le

Timpeallacht dhearfach oibre i gcomhair na bhfostaithe gorma agus fostaithe ó mhionlaigh eitneacha (agus fostaithe ón Lucht Siúil san áireamh),
Leas na bhfostaithe,
Táirgiúlacht an ionaid oibre,
Sástacht na gcustaiméirí agus bonn níos leithne custaiméirí, agus
An comhionannas iomlán san ionad oibre ó thaobh an chleachtais de.

Is í is sprioc leis an gcomhtháthú éifeachtach ná ionaid oibre atá éagsúil ó thaobh an chultúir de a chruthú sa dóigh go bhfuil siad idirchultúrtha agus comhtháite.

Ar 8 Samhain tionólfaidh na comhpháirtithe comhdháil ar théama an Chomhtháthaithe.

An Comhtháthú san Ionad Oibre Gníomh a dhéanamh sa bhliain 2006

Sa tSeachtain um Ionad Oibre Frithchiníoch tugtar faoi thionscnaimh chun an éagsúlacht chultúrtha a cheiliúradh san ionad oibre agus chun dúshraitheanna a chur síos d'ionad oibre idirchultúrtha comhtháite. Is é an toradh a bheidh ar na tionscnaimh seo ná tionscnaimh fadtréimhseacha chun ionad oibre den chineál sin a chruthú agus a chothú.

D'fhéadfadh na tionscnaimh na nithe seo a chuimsiú:

A) Tacaíocht d'fhostaithe gorma agus d'fhostaithe ó mhionlaigh eitneacha (agus fostaithe ón Lucht Siúil san áireamh)

Sainaithin agus scaip ábhair eochaireolais a bheidh ar fáil sna teangacha ábhartha.
Cuir seisiún mionteagaisc faoi chearta fostaíochta ar fáil.
Eagraigh imeacht sóisialta a dhéanfaidh nasc idir oibrithe imirceacha agus imeachtaí agus tionscnaimh áitiúla.
Tionóil meitheal oibrithe imirceacha chun a gcuid riachtanas agus conas is fearr riar orthu a chíoradh.

B) Tacaíocht do na fostaithe go léir

Eagraigh imeacht oiliúna d'fhostaithe faoi shaincheisteanna an chomhionannais, na héagsúlachta cultúrtha agus an chiníochais.
Eagraigh imeacht mionteagaisc faoi thiomantas an fhiontair don chomhionannas agus don éagsúlacht chultúrtha agus do na beartais, na cleachtais agus na gnáthaimh a chuirfidh taca faoin tiomantas seo.
Eagraigh imeacht chun an tseachtain a cheiliúradh agus tiomantas an fhiontair a dhéanamh ó thaobh na hidirchultúrthachta agus an chomhtháthaithe.

C) An t-ionad oibre a fhorbairt

Ullmhaigh agus cothaigh plean gníomhaíochta i gcomhair na seachtaine ina nglacfaidh an bhainistíocht, na ceardchumainn agus na fostaithe páirt.
Cuir an póstaer frithchiníochais i gcomhair na seachtaine ar taispeáint in áit fheiceálach agus dáil bileoga faoin tseachtain ar na fostaithe go léir.
Bain feidhm as córais inmheánacha chumarsáide chun na fostaithe go léir a chur ar an eolas faoin tseachtain agus faoin tiomantas don ionad oibre idirchultúrtha.
Má tá an fiontar suite in áit ina bhfuil plean áitiúil gníomhaíochta á fhorbairt, déan teagmháil leis an eagraíocht chomhordaitheach.
Tacaigh le fostaithe ó thaobh freastal ar chomhdháil na seachtaine ar 8 Samhain.

Plean Gníomhaíochta don Ionad Oibre Frithchiníoch

Tá na heagraíochtaí comhpháirtíochta a ghlacann páirt sa tSeachtain um Ionad Oibre Frithchiníoch tar éis plean gníomhaíochta a leagan amach ina sonraítear seacht bpointe chun go gcuirfidh fiontair agus eagraíochtaí an comhionannas chun cinn in ionaid oibre atá éagsúil ó thaobh an chultúir de.

Cuimsíonn an plean gníomhaíochta:

Tacú leis an Mionlach é féin a chur in Oiriúint
- Oiliúint Intreorach a chur ar fáil d'oibrithe imirceacha.
Difríochtaí Cultúrtha a chur san Áireamh
- Socruithe oibre um chomhardú saoil agus saothair a chur i ngníomh d'fhostaithe gorma agus d'fhostaithe ó mhionlaigh eitneacha (agus fostaithe ón Lucht Siúil san áireamh).
Dearcaintí an Tromlaigh a Athrú
- Oiliúint chomhionannais agus éagsúlachta a chur ar fáil do na fostaithe go léir.
Aghaidh a Thabhairt ar Iompraíocht an Tromlaigh
- Athbhreithniú a dhéanamh, nór murab ann dóibh cheana, forbairt a dhéanamh ar bheartais agus ar ghnáthaimh faoin bhfrith-idirdhealú, faoin ngnéaschiapadh agus faoin gciapadh. Cruthaigh timpeallachtchomhchuí ina bhféadfaidh na fostaithe go léir a gcion féin a dhéanamh ar mhaithe lena lánacmhainneacht.
Rialacha agus Gnáthaimh a Athrú
- Athbhreithniú a dhéanamh ar na beartais agus gnáthaimh fostaíochta go léir chun a chinntiú go dtógann siad ceann don éagsúlacht chultúrtha theangeolaíoch.
Earcaíocht Ghníomhach agus Ardú Céime Gníomhach
- Plean gníomhaíochta comhionannais a fhorbairt chun an comhionannas iomlán ó thaobh an chleachtais de a bhaint amach.
An Comhionannas a Phríomhshruthú
- Aiceann comhionannais a neadú i ngnáthmhodhanna agus i ngnáthchinnteoireacht na bainistíochta.